Самае містычнае свята

imagesФальклор заўсёды адыгрываў важную ролю ў фарміраванні духоўнасці чалавека. Зварот да традыцый беларускага народа азначае развіццё беларускай культуры.

У старажытныя часы і зараз вялікай папулярнасцю карыстаюцца народныя абрады. Адным з асноватворных сродкаў этнакультурнага выхавання дзіцяці з’яўляецца беларуская народная творчасць.

Вызначальную ролю ў этнакультурным выхаванні вучня выконвае стварэнне культурна-развіваючага асяроддзя, таму ў нашым ВПК традыцыйным стала святкаванне Каляд – аднаго з самых містычных святаў у старажытных славян. Яно менш звязана з сельскагаспадарчым цыклам, а больш з будовай і рухам сусвету.

Першы дзень Калядаў – дзень, у які даўжыня светлавога дня пачынала павялічвацца пасля зімовага сонцастаяння. У адрозненні ад сельскагаспадарчага новага года, каторы з’яўляўся пачаткам працы ў полі, на Каляды «нараджалася новае сонца», час «паварочваўся на вясну». Новае сонца ўвасаблялася ў вобразе дзіцяці, выкрадзенага лютай вядзьмаркай Зімою, каторая ператварыла яго ў ваўка. Але светлыя сілы, вядома, перамагаюць, гарачыя промні маладога сонца спальваюць ваўчыную скуру, яно вызваляецца з палону цёмных сіл і пакрысе «сталее», з кожным днём набіраючы сіл да вясны.

Само слова «каляды» мае паходжанне ад лацінскага calendae, «календы» – назва першага дня кожнага месяца (ад таго кораня пайшоў і «каляндар»), а таксама ад старажытнай назвы сонечнага дыску – Кола.

Таццяна Абрамовіч, Ангеліна Баглова, Марына Грыгор’ева, Дзмітрый Лявіцкі, Лізавета Сямёнава, Таццяна Шапавалава падрыхтавалі беларускі народны абрад святкавання Каляд. Цэнтральнае месца ў калядаванні занялі Мядзведзь і Каза. Дзеці спявалі песні, чыталі калядныя вершы, жадалі шчасця і здароўя.

У дзіцячым садзе вельмі запамінальным для дашкалят таксама стала Каляднае свята. Дзеці завіталі ў госці да Лявона і Лявоніхі (на здымку). Свята суправаджалася прысутнасцю галоўных герояў: Мікіты з Казою, Цыганкі з Мішкам. А Чорт і Ведзьма хацелі свята сапсаваць.

Нішто не пашкодзіла стаць святу цікавым і незабыўным. У ім удзельнічалі выхавацелі дзіцячага сада — Валянціна Воранава (у ролі Лявона), Алена Казлова (у ролі Цыганкі), Любоў Мандрык (у ролі Лявоніхі), вучаніцы 8 класа —  Ангеліна Баглова (у ролі Мікіты), Лізавета Сямёнава (у ролі Вядзьмаркі), Таццяна Абрамовіч (у ролі Чорта), дашкаляты Таня Александровіч (у ролі Казы ) і Максім Грыгор’еў (у ролі Мядзведзя). Музычнае суправаджэнне ажыццяўлялася музычным кіраўніком, настаўнікам музыкі ДУА “Макранскі ВПК д/с-СШ” Аленай Савосцікавай.

Алена Цывілька