У цэнтральнай раённай бібліятэцы заўсёды можна ўбачыць нешта цікавае
У цэнтральнай раённай бібліятэцы, якая летась атрымала імя нашага земляка, пісьменніка і публіцыста Барыса Стральцова, заўсёды можна ўбачыць нешта цікавае, адметнае. Такую выснову раблю таму, што вось ужо амаль чатыры дзесяцігоддзі наведваю гэтую ўстанову культуры, гутару з яе супрацоўнікамі, удзельнічаю ў праводзімых ёю мерапрыемствах.
Завітаў і зараз. У вочы кінулася арыгінальна аформленая выстава-рэкамендацыя “Бібліятэкар — чытачам”.
Галоўны бібліятэкар ЦРБ Наталля Чарняўская паведаміла, што тут змешчаны з кароткім апісаннем зместу самыя самыя любімыя кнігі супрацоўнікаў бібліятэкі, пачынаючы з яе дырэктара Наталлі Корза. Наталля Аляксандраўна лічыць сваім любімым творам раман англійскага пісьменніка Коліна Маккалау “Поющие в терновнике” у перакладзе на рускую мову. Тут жа стаіць названая кніга.
Любімая кніга намесніка дырэктара Валянціны Зайкінай — раман Алены Чыжовай “Время женщин”, а загадчыцы аддзела рэкламы і маркетынгу Таццяны Каржовай — раман Вольгі Тарасевіч “Плачущий ангел Шагала”.
Бібліятэкар другой катэгорыі вышэй названага аддзела Алена Фядотава ў захапленні ад рамана Юрыя Татарынава “Княгіня Мянжынская”, які выстаўлены тут на беларускай мове, але ёсць ён і на рускай мове.
Сваёю любімаю кнігаю бібліятэкар гэтага аддзела Надзея Альшэўская называе раман народнага пісьменніка Беларусі Івана Шамякіна “Сатанінскі тур”. І ён знайшоў тут сваё пачэснае месца.
Аддае перавагу творам беларускіх аўтараў і яе больш вопытная калега, бібліятэкар першай катэгорыі аддзела абслугоўвання і інфармацыі Алена Сідарэнка, якой асабліва падабаецца раман Яўгена Хвалея “Прынцэсса тусоўкі”.
Свой выбар зрабіла таксама бібліятэкар другой катэгорыі аддзела абслугоўвання Аксана Дрозд. Яна з усіх прачытаных апошнім часам кніг аддала перавагу раману расійскай пісьменніцы Паліны Дашковай “Место под солнцем”.
Ёсць свая любімая кніга і ў бібліятэкара другой катэгорыі з аддзела абслугоўвання і інфармацыі Святланы Вашукевіч. Гэта рускамоўны раман Томаса Гардзі “Тэсс из рода д ‘Эрбервиллей».
Толькі названымі любімымі кнігамі бібліятэкары не абмежаваліся. На дзвюх ніжніх паліцах выставы змешчаны хіт-парад іншых любімых кніг. Тут стаяць “Алые паруса” Аляксандра Грына, бачыцца “Горький запах полыни” Ганада Чарказяна, іншыя запатрабаваная ў чытачоў літаратура.
Мікола КОЛАСАЎ.