Праца на энерганасычаным трактары МТЗ-3022 сама сабою адразу падразумевае выкананне шматлікіх відаў складаных і адказных работ, с чым выдатна спраўляецца адзін з пераможцаў раённага спаборніцтва ў мінулагодняй корманарыхтоўчай кампаніі, механізатар СВК “Навабыхаўскі” Павел Казюлька.

У добрым рытме працуе Павел Іванавіч амаль круглы год, бо ягоная тэхніка запатрабавана на самых розных участках сельгасвытворчасці. Узімку ён заняты на забеспячэнні ферм гаспадаркі травяністымі кармамі, кукурузным сіласам, дастаўкай мінеральных угнаенняў пад веснавую сяўбу, транспарціроўкай іншых відаў грузаў. Увесну настае чарга менавіта земляробскай працы, бо ўжо каторы год ён падчас вясенне-палявой кампаніі на сваім магутным трактары з высокапрадукцыйнымі абаротнымі плугамі ўзорвае і рыхтуе глебу для сяўбы.

—Але ўсё ж самы напружаны для мяне час настае тады, калі пачынаецца кашэнне траў і нарыхтоўка травяністых кармоў, — распавядае пра самы адказны перыяд ягонай працы перадавы механізатар. — Тут ужо ў пару да трактара далучаю корманарыхтоўчы камбайн УЭС-2-250, з якім і працую з мая і да канца кастрычніка. На пачатку кампаніі кашу травы і канюшыну на зялёны корм для жывёлы, а дзесьці на стыку мая і чэрвеня пачынаецца непасрэдна нарыхтоўка сенажу і сіласу.

Гэты сезон года з самымі кароткімі начамі дазваляе працаваць увесь 14-15-гадзінны светавы дзень, чым мы і скарыстоўваемся. Пад кіраўніцтвам вопытнага галоўнага агранома гаспадаркі Васіля Цікавенкі выбіраем падыходзячыя плошчы сенакосныя плошчы і ў тэхналагічным рэжыме разам з работнікамі, занятымі на адвозцы зялёнай масы, стараемся ў аптымальныя сціслыя тэрміны, бо ад гэтага наўпрост залежыць якасць кармоў, закласці сянаж альбо сілас на захаванне.

Доўжыцца самы прадуктыўны перыяд гэтай кампаніі каля месяца, і тут стараемся выкласціся поўнасцю. Знаходзім у стварэнні ўмоў для працы паразуменне з боку кіраўніцтва і спецыялістаў кааператыва, асабліва, што тычыцца арганізацыі харчавання, інфармацыйнага забеспячэння і г. д.

У перыяд паміж летняй і восеньскай корманарыхтоўчымі кампаніямі асноўным для мяне відам работ зноў жа становіцца ўзорванне глебы пасля летняга жніва пад сяўбу рапса і азімых збожжавых культур.

Шмат ды насычана даводзіцца папрацаваць падчас нарыхтоўкі кукурузы на сілас. Тады таксама яе ўборка доўжыцца некалькі тыдняў, бо, хоць тэхніка даволі высокапрадукцыйная, плошчы пад “царыцаю” палёў занятыя вялікія і падыходзяць яны па якасным паказчыкам для скошвання ў розныя тэрміны.

Позняй жа восенню, калі дазваляюць умовы надвор’я і агратэхнікі, звычайна займаюся падняццем зябліва пад ураджай будучага года.

Па выніках работ на нарыхтоўцы кармоў у мінулым годзе ў механізатара СВК “Навабыхаўскі” Паўла Казюлькі атрымаліся адны з самых высокіх паказчыкаў у раёне, у тым ліку ім нарыхтавана каля 4,5 тысяч тон сянажнай масы, звыш 7,1 тыс. тон кукурузнай масы на сілас, амаль 2,5 тыс. тон зялёнай масы на падкормку.

Даволі аптымістычныя погляды ў маладога механізатара і на арганізацыю свайго асабістага жыцця. Жыве ён з сям’ёю — жонкаю і 4-гадовым сынам — у добраўпарадкаваным доме, што пабудаваў яму калгас некалькі год таму назад. Плённая праца дазваляе атрымліваць неблагія заробкі і забяспечваць болей-меней годнае жыццё родным і блізкім.

Мікалай Ахрыменя.