Творчасць дзяцей заўсёды незвычайная і разнастайная. Яна напоўнена іх запалам і энергіяй, свежымі думкамі і вабнымі ідэямі. І вельмі добрае, калі рабятам ёсць у чым увасобіць усё, задуманае. Вялікую ролю ў гэтым выконвае школьны друк, які аб’ядноўвае вакол сябе вучняў самых розных узростаўі, інтарэсаў.

23 школьныя газеты выходзяць зараз ў нашым раёне: “Гонг” (Гімназія г. Быхава), “Званок” (Новобыхаўскі ВПК), “Аднагодак” (СШ №2 г. Быхава), “Школьны калейдаскоп” (Баркалабаўскі ВПК»), іншыя выданні.

— Амаль у кожнай установе адукаціі раёна штомесячна з’яўляецца свая газета, у якой вучнёўская рэдкалегія пад непасрэдным кіраўніцтвам педагогаў распавядаюць пра школьнае жыццё, ягоныя падзеі, дасягненні і поспехі ў вучобе, удзел у спартыўных мерапрыемствах, творчых конкурсах.

Найбольш папулярнымі з’яўляюцца рубрыкі “Аб жыцці, аб людзях, аб сабе”, “Нашы дасягненні”, “Мы разам — за здоровы лад жыцця”, “Лепшы фотарэпартаж”, “Творчая майстэрня”, “Проба пяра”, “Летапіс школы”, “У свеце цікавага”, “Віншуем”, — гаворыць метадыст аддзела адукацыі, спорту і турызму райвыканкама Ірына Грыгаржэўская. —.У сёлетнім годзе школьныя газеты пісалі больш пра Дзень беларускага пісьменства на Быхаўшчыне, дзе, зразумела, выказвалі свае ўражанні ад свята, а таксама пра мерапрыемствы па беражлівасці, пра навіны ў пачатку навучальнага года.

Чым жыве школа можна даведацца не толькі на старонках газе-ты кожнай установы адукацыі, але і непасрэдна на сайце аддзела адукацыі, спорту і турызму райвыканкама, на якім таксама размяш-чаюцца допісы школьных карэспандэнтаў.

Калі адзначыць самых актыўных з іх, то трэба назваць Вольгу Сямёнаву, Марыну Мінчукову (Баркалабаўскі ВПК), Валерыю Арцем’еву, Юлію Галубчык, Марыю Астанкаву, Паліну Адамчанка, Карыну Вашукевіч, Ганну Ганчарову (гімназія г. Быхава), Паліну Гарбацэвіч, Дар’ю Клінцову (СШ №1 г. Быхава), Яніну Юшкевіч з (СШ №2 г. Быхава), Таццяну Мельнікаву (СШ №3 г. Быхава), Вікторыю Фурманаву (Гадылёўскі ВПК). Некаторыя з іх ужо мелі пробу пяра і у раённай газеце «Маяк Прыдняпроўя».

— Выпуск газеты — гэта вельмі карпатлівая праца. Неабходна прадумаць тэматыку нумара, падабраць матэрыялы і ілюстрацыі. У кожным нумары юныя карэспандэнты пішуць аб жыцці школы і пад-зеях, якія адбыліся за месяц, віншуюць настаўнікаў і таварышаў з рознымі святамі. Праца карэспандэнта — гэты, першым чынам, рух. Каб пра нешта напісаць, трэба кудысьці схадзіць, нешта ўбачыць, — кажа рэдактар газеты «Школьны прэс-центр» (СШ №1 г. Быхава) Вольга Янюк (на здымку). — Выдатна адбіваецца гэтая калектыўная творчая справа і на паспяховасці школьнікаў, бо яны вучацца быць арганізаванымі, дысцыплінаванымі, у іх развіваецца ўменне працаваць у групе і прыходзіць на дапамогу адзін аднаму. А для іншых гэта яшчэ і добры арыенцір на будучую прфесію. Напрыклад, нашы былыя юныя карэспандэнты Людміла Сухарукава скончыла Інстытут журналістыкі БДУ, а Аляксей Рагалёў вучыцца на факультэце славянскай філалогіі (спецыяльнасць “Журналістыка”) МДУ імя Аркадзя Куляшова.

Сяргей АНДРЭЕЎ.