Да юбілейнага 20-га свята Дня беларускага пісьменства, які сёлета сустракае Быхаў, застаецца крыху больш за два тыдні. Вобласць актыўна занята падрыхтоўкай: практычна ўсе буйныя ўстановы культуры рэгіёна рыхтуюць сваю праграму, у тым ліку і музейшчыкі.

Ад пейзажнай лірыкі да батлейкі дзевятнаццатага стагоддзя – так здзіўляць гасцеў і жыхароў Быхава будзе Магілёўскі абласны мастацкі музей імя Паўла Масленікава. Вернісажная экспазіцыя, якую рыхтуюць магілёўскія музейшчыкі, на свяце заяўлена трыма вялікімі блокамі.

Першыя два складаюцца з работ, якія стварылі мастакі з розных краін падчас пленэраў «Образ Родины в изобразительном искусстве» мінулых гадоў. На палотнах гледачы ўбачаць унікальныя па прыгажосці пейзажы, старадаўнія вулачкі, архітэктурныя помнікі і саборы Быхава, Мсціслава і Шклова. Аўтары гэтых твораў – не толькі майстры з Беларусі, але і з Расіі, Сербіі, Украіны.

Яшчэ адзін падарунак быхаўчанам і гасцям свята ад магілёўскіх музейшчыкаў – гэта магчымасць ажыццявіць вандроўку на пару сотняў гадоў назад. Акунуцца ў атмасферу канца 19-га стагоддзя можна будзе дзякуючы сапраўднай беларускай батлейцы. Прычым рэканструявана будзе менавіта мясцовая батлейка з сяла Быч Быхаўскага павета Магілёўскай губерні, паведамляе «Радыё Магілёў”.