У ДНУ “Яслі-сад №2 “Журавінка” дзетак вучаць беларускай мове
Аб тым, як у ДНУ “Яслі-сад №2 “Журавінка” дзетак вучаць беларускай мове, распавяла Алена Алегаўна Свірчанка, намеснік загадчыка па асноўнай дзейнасці.
– Мы вучым дзяцей не толькі на занятках, але і ў паўсядзённым жыцці. Наша мэта – выхаваць у іх любоў да роднай мовы і ў даступнай форме навучыць яе разумець.
Адзін раз на тыдзень выхаванцы садка праводзяць заняткі па беларускай мове ў форме гульні ў
сярэдняй і старшай групах. Дзеткі вучацца называць прадметы на беларускай мове, перакладаць, завучваць невялікія тэксты.
Акрамя заняткаў, існуюць иншыя цікавыя формы работы. Праводзіцца мастацка-моўная дзейнасць з выкарыстаннем твораў беларускай дзіцячай літаратуры. Гэта чытанне казак, вершаў, завучванне пацешак.
Вольга Уладзіміраўна Аспішчава, кіраўнік фізвыхавання, актыўна выкарыстоўвае гульні на беларускай мове. Штодзённа на працягу дня ў вольны час праводзяцца “Гадзінкі беларускай мовы”. Супрацоўнікі дзіцячага садка арганізоўваюць для сваіх падапечных фальклёрныя святы. Узімку прайшлі Каляды, летам плануецца “Купалле”, а восенню – тэматычнае свята “Восеньскі кірмаш”.
Кацярына СВІРЫДЗЕНКА.