У другі раз нядзельным днём прайшоў у Быхаве кірмаш
У другі раз нядзельным днём прайшоў у Быхаве кірмаш, на якім гандлявалі сваёй прадукцыяй сельскагаспадарчыя кааператывы раёна з самага ранку. Яе прывезлі СВК “Следзюкі”, УКСП “Саўгас “Вараніно”, філіял Макранскі ААТ “Быхаўскі КАСЗ”, філіял Лудчыцы ААТ “Быхаўрайаграпрамзабеспячэнне”, СВК “Навабыхаўскі”, “Трасна”, некаторыя іншыя гаспадаркі.
Пакупнікоў хапала, таму мы і пацікавіліся іх меркаваннямі наконт патрэбнасці такіх кірмашоў для быхаўчан.
Анатоль Пятровіч, 82 гады:
— Купіў вось чатыры сеткі бульбы, суседка папрасіла. Клубні важкія, не пашкоджаныя. Значыць, добра будуць захоўвацца.
Валянціна Сямёнаўна, таксама пенсіянерка:
— Бульба мне не патрэбна, сваю вырасціла, а вось капуста не ўрадзіла. Таму і прыйшла на кірмаш. Скажу шчыра, качаны мне падабаюцца: крамяныя, не парэпаныя. Вось і ўзяла дзесятак.
Ганна Васільеўна, хатняя гаспадыня:
— Мне морква была патрэбна, пяць кілаграмаў і купіла, бо вельмі спадабаўся яе таварны выгляд.
Іван Васільевіч, будаўнік:
— Характар маёй работы такі, што трэба кожны дзень ужываць у ежу мяса, інакш кепскі тады будзеш працаўнік. Вось і завітаў сюды, каб выбраць сабе патрэбныя кавалкі свініны, ялавічыны. А выбар ёсць. Таму і купіў хутка.
Выбар сапраўды быў. Свініна каштавала ў сярэднім 42 тысячы рублёў за кілаграм, яе выразка — 55-60 рублёў. Прыкладна па такой цане прадавалася і ялавічына.
Сетку бульбы аддавалі за 30-35 тысяч рублёў, за кілаграм капусты людзі плацілі ў сярэднім па 1700 рублёў, морквы — 2000 рублёў, зерня пшаніцы — 1900 рублёў, а ячменю — 1,5 тысячы рублёў. Гэтую адборную, якасную сельгаспрадукцыю быхаўчане куплялі ахвотна, выказваючы пажаданні, каб такія кірмашы ладзіліся і надалей.
Апытваў Мікола КОЛАСАЎ.