Выбары — 2012: Будзе галасаваць і назіраць

Баркалабаўскі сельсавет з’яўляецца тыповай сельскай тэрыторыяй нашага раёна, таму для яго Выбары - 2012: Будзе галасаваць і назірацьхарактэрны многія ўласцівасці арганізацыі вясковага сацыяльнага і грамадска-палітычнага жыцця. Гэта тычыцца і сёлетняй кампаніі па выбарах дэпутата Палаты прадстаўнікоў Нацыянальнага сходу Рэспублікі Беларусь пятага склікання па Быхаўскай выбарчай акрузе №81.

—Спіс выбаршчыкаў на цяперашні момант налічвае  483 чалавекі, — распавядае старшыня ўчастковай выбарчай камісіі Баркалабаўскага ўчастка для галасавання №14 Васіль Бацвянкоў. — Камісія наша старанна яго  ўдакладніла, улічыўшы па магчымасці ўсе акалічнасці. Амаль палову выбаршчыкаў, а гэта 234 чалавекі, складаюць людзі пенсійнага ўзросту. Толькі два жыхары сельсавета, якія дасягнулі на момант галасавання 18 год, упершыню возьмуць удзел у выбарах.

Наш выбарчы ўчастак ахоплівае увесь сельсавет, таму для належнай арганізацыі галасавання камісія разам з выканаўчай уладай прадугледзела шэраг момантаў. Гэта тычыцца папярэдняга вызначэння з улікам узросту, стану здароўя, іншых акалічнасцей кантынгенту выбаршчыкаў, для якіх будзе прадастаўлена магчымасць прагаласаваць па месцы жыхарства, правядзення датэрміновага галасавання, падвозу выбаршчыкаў на ўчастак для галасавання і іншых асаблівасцей выбарчай кампаніі на вёсцы.

Падрыхтаваны, абсталяваны і аформлены памяшканні ўчастка ў Баркалабаўскім культурна-спартыўным цэнтры. Тут маецца ўся неабходная дакументацыя, у тым ліку з дадзенымі аб кандыдатах у дэпутаты. Цяпер арганізавана дзяжурства членаў выбарчай камісіі, у якіх выбаршчыкі могуць удакладніць розныя пытанні гэтай выбарчай кампаніі.

Тым жа днём давялося пагутарыць і з адным са сталых выбаршчыкаў сельсавета, былым старшынёю Баркалабаўскага сельскага Савета дэпутаў Васілём Зінкаўцом. Васіль Фёдаравіч каля 26 гадоў узначальваў мясцовы орган улады, добра памятае часіны галасавання за кандыдатаў, так званага, блоку камуністаў і беспартыйных, іх арганізацыю, асаблівасці і можа параўноваць тыя і гэтыя выбарчыя кампаніі:
—Я прыняў першы ўдзел у галасаванні яшчэ ў вельмі ўжо далёкім 1958 годзе. Тады жыў у вёсцы Несята Клічаўскага раёна. Галасаванне, як памятаецца, на выбарах дэпутатаў сельскага Савета дэпутатаў працоўных ішло ў сельскім клубе, але ва ўрачыстай абстаноўцы, як святочнае мерапрыемства.

З 1963 года жыву і галасую на Быхаўшчыне. Апошнімі гадамі выбарчыя кампаніі ў нас праходзяць вельмі арганізавана з актыўным удзелам выбаршчыкаў. Падыходы цяперашняй дзяржаўнай улады як да ажыццяўлення сацыяльна-эканамічнай палітыкі, так і да стварэння ўмоў для рэалізацыі выбарчых праў і інтарэсаў грамадзян мне падабаюцца, таму прыму ўдзел у галасаванні і аддам голас кандыдату з канструктыўнай і рэальнай пазіцыяй. Актыўна буду дзейнічаць і як афіцыйны назіральнік на выбарчым участку №14, каб апраўдаць давер вылучыўшай мяне ветэранскай арганізацыі нашага сельсавета.

Іван Мікалаеў.

Wordpress snowstorm powered by nksnow