Шэраг мерапрыемстваў ладзілася падчас тыдня кнігі, які праходзіў з 2 па 8 верасня, бібліятэкамі, школамі раёна
Настаўніца беларускай мовы і літаратуры Макранскага ВПК “Дзіцячы садок –сярэдняя школа” Алена
Уладзіміраўна Цывілька запрасіла на сустрэчу з вучнямі галоўнага рэдактара газеты “Маяк Прыдняпроўя”, члена Саюза пісьменнікаў Беларусі Міколу Леўчанку, які расказаў аб сваім творчым шляху, аб тым, як працаваў над сваімі трыма апошнімі кнігамі “Уроки мужества”, “Непраходзячы боль”, “Крылатая гвардия”. Ён найбольш акцэнтаваў увагу на кнізе “Непраходзячы боль”, бо ў ёй распавядаецца пра малалетніх вязняў фашысцкіх канцлагераў, ураджэнцаў Быхаўшчыны. З імі аўтар сустракаўся асабіста, гутарыў, суперажываў. І кніга атрымалася вельмі праўдзівай.
Настаўніца роднай мовы і літаратуры Яромава Тамара Яўгенаўна па прапанове пісьменніка прачытала ягонае гумарыстычнае апавяданне “Калі цвілі сады” з кнігі “Пад знакам зялёнай ружы”, напісанага на падставе ўспамінаў свайго далёкага школьнага жыцця. Мяркуючы па вясёлых усмешках дзяцей, твор ім спадабаўся.
Дарэчы, настаўніца Алена Цывілька імкнецца развіваць у сваіх выхаванцаў творчыя задаткі. Таму падрыхтавала і прапанавала рэдакцыі “МП” свій артыкул па творах юных аўтараў. І артыкул гэты пад назваю “Ад бацькоўскага парога“ друкаваўся ў газеце 8 жніўня сёлетняга года.
Калі шаноўны госць пацікавіўся, ці чытаюць хлопчыкі і дзяўчынкі сваю раённую газету, то ўзняўся лес рук. Значыць, бацькі выпісваюць “Маяк Прыдняпроўя”, чытаюць яго не толькі самі.
Сяргей АНДРЭЕЎ.