Дзень Незалежнасці ў Быхаве (фото)
Трэцяга ліпеня з дзесяці гадзін раніцы ад плошчы імя маршала авіяцыі Сцяпана Красоўскага пачалося ўрачыстае шэсце ветэранаў і ўдзельнікаў Вялікай Айчынай вайны, лепшых прадстаўнікоў працоўных калектываў, моладзі. Па галоўнай вуліцы горада Быхава разам з імі да Кастрычніцкай плошчы прайшлі таксама члены райвыканкама, прэзідіўма раёнага Савета дэпутатаў, грамадскіх аб’яднанняў.
На мітынгу, які вёў намеснік старшыні райвыканкама Вадзім Рагавы, быхаўчан і гасцей горада з Днём Незалежнасці Рэспублікі Беларусь павіншаваў старшыня райвыканкама Мікалай Кароцін. Мікалай Мікалаевіч адзначыў, што, святкуючы шэсцьдзесят восьмую гадавіну вызвалення нашай краіны ад нямецка-фашысцкіх захопнікаў, мы аддаём даніну глыбокай павагі і бязмежнай удзячнасці і падзякі пакаленню пераможцаў, якое з доблесцю і славай разграміла агрэсара і самаадданай працай у пасляваенны час у самыя сціслыя тэрміны аднавіла народнагаспадарчы комплекс краіны.
Сёння мы з найвялікшай удзячнасцю ўспамінаем усіх, хто не схіліў галаву перад ворагам, паклаў жыццё на алтар Перамогі і абессмяроціў сваё імя.
Для ўсіх дарагія і зразумелыя нашы агульныя каштоўнасці: гонар за краіну, жаданне працаваць для яе росквіту і роднага Прыдняпроўскага краю, любоў да сваёй зямлі, сям’і, родных.
Выдатна, што з разуменнем патрыятычнага значэння сваёй працы ствараюць імідж нашага краю не толькі ў Беларусі, але і за яе межамі якаснай і таму вядомай і запатрабаванай прадукцыяй працоўныя калектывы ААТ “Быхаўскі кансервава-агароднінасушыльны завод”, СЗАТ “Белатміт”, ГЛХУ “Быхаўскі лясгас”, завода палімернай ўпакоўкі, хлебазавода.
З высокай адказнасцю працуюць работнікі сферы абслугоўвання — сацыяльнай і медыцынскай службаў, бытавога абслугоўвання, педагогі і іншыя спецыялісты. Тут прадстаўнікі розных пакаленняў. Але характэрна, што наша моладзь працягвае лепшыя працоўныя традыцыі ветэранаў, праяўляе актыўнасць у выкананні службовых абавязкаў і ў грамадскім жыцці. У гэтым бачыцца добрая перспектыва на будучыню.
Кіраўнік раёна паведаміў прысутных, што з галоўным дзяржаўным святам краіны іх павіншаваў сітаршыня Магілёўскага аблвыканкама Пётр Руднік, выканкамы суседніх раёнаў, абласныя службы, ганаровыя грамадзяне Быхаўшчыны. І зачытаў некаторыя з іх.
Удзельнікаў віншавалі таксама старшыня савета ветэранаў раённай арганізацыі працаўнікоў адукацыі і навукі Людміла Банадысева, ваенны камісар раёна Уладзімір Ткачук і выпускніца гімназіі г. Быхава Ганна Бараздзіна.
Загінуўшых вайскоўцаў у часы Вялкіай Аычынай вайны і ветэранаў, якіх ўжо няма з намі, ўшанавалі хвілінай маўчання.
Па заканчэнні мітынга пачаўся святочны канцэрт. На плошчы і Пеўчым полі да сябе запрашалі прыгожа аформленыя падворкі аграгарадкоў, гандлевыя палаткі, дзіцячыя пляцоўкі, розныя выставы.
Дэгустацыю сваёй прадукцыі прапанаваў удзельнікам свята ААТ “Быхаўскі КАСЗ”.
У вечары на Кастрычніцкай плошчы разгарнулася масавае народнае гулянне, пасля якога прайшла патрыятычная акцыя “Спяваем гімн разам”. Скончылася вялікае свята відовішчным фейерверкам.
Сяргей ЛЕЎЧАНКА.