Набліжаецца да завяршэння падпісная кампанія на раённую газету “Маяк Прыдняпроўя”, якой 25 снежня спаўняецца 93 гады з дня яе заснавання. Гэта вельмі сталы і салідны ўзрост, за каторы наша адно з старэйшых выданняў Магілёўшчыны вытрымала самыя суровыя выпрабаванні часам. Газета заўсёды была з народам падчас вайны з белапалякамі, станаўленні на Быхаўшчыне Савецкай улады, калектывізацыі і ў гады Вялікай Айчыннай вайны, аднаўлення разбуранай ёю народнай гаспадаркі, будаўніцтва сацыялізму, а таксама тады, калі наша родная Беларусь стала незалежнай, і цяпер, калі яна ўмацоўвае свой суверэнітэт на міжнароднай арэне.

Падчас акупацыі нямецка-фашысцкімі захопнікамі нашай зямлі, раёнка выходзіла ў рукапісным фармаце пад назваю “Партызан Быхаўшчыны” у лесе за вёскаю Барсукі былога Дунайкоўскага  сельсавета. Там, у зямлянцы, яе рыхтавалі народныя мсціўцы. Рыхтавалі і даносілі да лясных салдатаў, мірных жыхароў усю патрэбную ім інфармацыю.

Зараз газету робяць прафесійныя журналісты, спецыялісты. Яна карэнным чынам адрозніваецца ад сваіх папярэдніц, якія ў розныя гады насілі розныя назвы, а з 3 красавіка 1963 года носіць сённяшнюю, мае сучасны выгляд, адпаведны дызайн, колернасць, хоць з-за дэфіцыту фінансавых сродкаў мы не маем  магчымасці зрабіць газету паўнакаляровую. Такой яна бывае звычайна з нагоды вялікіх святаў, ды і тое толькі першая і апошніяя старонкі. Але шчыра веру ў тое, што некалі наш “Маяк Прыдняпроўя” стане менавіта такім выданнем.

Газета жыве дзякуючы сваім чытачам, сваім падпісчыкам. Для іх яна друкуе ўсю неабходную інфармацыю, якая датычыцца грамадска-палітычнага жыцця рэгіёна і краіны, падзей у культуры, адукацыі, фізічнай культуры і спорце, адукацыі, ахове здароўя, сацыяльнай сферы, расказвае пра найбольш цікавыя гістарычныя падзеі, справы лепшых вытворчых калектываў і асобных працаўнікоў, іх дасягненні, знаёміць з творчасцю сталых і маладых аўтараў, распаўсюджвае матэрыялы рэкламнага характару, друкуе найбольш актуальныя пісьмы альбо скарыстоўвае падказаныя ў іх тэмы. Гэта яскрава сведчыць аб тым, што прынцып “газета — чытач — газета” актуальны па сённяшні дзень, як і праводзімыя для людзей нашы “прамыя лініі”.

Цесную сувязь са сваімі чытачамі рэдакцыя будзе падтрымліваць пастаянна, абапіраючыся на свой актыў, сваіх няштатных аўтараў, якія дапамагаюць  нам рыхтаваць газетныя нумары больш цікавымі, інфармацыйна насычанымі.

У наступным, 2012 годзе, мы маем намер ажыццявіць новыя творчыя праекты, якія будуць тычыцца 200-годдзя вайны 1812 года, майстроў народных рамёстваў, некаторых іншых аспектаў нашага Прыдняпроўскага краю. Мы будзем вельмі ўдзячны кожнаму, хто падкажа нам любую актуальную тэму, тым болей вартасны творчы праект. Таму дасылайце нам свае паштовыя альбо электронныя допісы на адрас, які змешчаны ў калантытуле на апошняй старонцы, ці на сайт. Таму заставайцеся з намі, выпісвайце і чытайце сваю раённую газету “Маяк Прыдняпроўя”, заснавальнікам якой з’яўляецца раённы выканаўчы камітэт, чытайце свой “Маячок”, ярка асвятляючы інфармацыйную прастору нашага Прыдняпроўскага краю, несучы ў хаты і кватэры яго жыхароў духоўнае святло.

Мікола ЛЕЎЧАНКА,

галоўны рэдактар “МП”.