На Быхаўшчыне працягваюцца ярмаркі па продажы сельскагаспадарчай прадукцыі
На Быхаўшчыне працягваюцца ярмаркі па продажы сельскагаспадарчай прадукцыі. Усе прапанаваныя прадукты харчавання натуральныя, вырашчаныя на нашай беларускай зямлі-карміцелькі.
У нядзелю з самай раніцы, падыходзячы да цэнтральнага рынку, быхаўчане і госці нашага горада маглі атрымаць асалоду ад прыгожага выканання песень на меладычнай роднай мове. Так шчыра сустракалі землякоў на кірмашы артысты мастацкай самадзейнасці раёна.
— Купляйце беларускае, не пашкадуеце! — пад гукі мелодый запрашалі на кірмаш мясцовыя артысты. Ды і прадаўцы, у сваю чаргу, былі рады прапанаваць кожнаму жадаючаму сельгаспрадукцыю на любы густ. У гэты дзень добра раскуплялі капусту, моркву. Асабліва тоўпіліся пакупнікі ля гандлёвых месцаў з шырокім асартыментам гародніны па прымальным цэнам.
Добра дапаўнялі святочны восеньскі кірмаш гарачыя і духмяныя шашлыкі і іншыя прысмакі, прадстаўленыя Быхаўскім АСП Магілёўскага райспажыўтаварыства.
Збожжа і бульбу прапаноўвалі ААТ “Навабыхаўскі”, “Валадарскі”, “Следзюкі”. Напрыклад, “Валадарскі” ўсяго за пару гадзін рэалізаваў увесь прывезены ячмень.
Рыбу прадавалі ў гэты раз у дзвюх гандлёвых кропках. Буйны адборны карп па цане 4.90 прывезлі з ААТ “Рассвет” ім. К.П. Арлоўскага. Бліжэй да поўдня з 200 кг рыбы засталося менш за палову. Нягледзячы на канкурэнцыю, каля гандлёвай кропкі ІП Шарабура сабралася чарга з пастаянных пакупнікоў і аматараў свежай рыбкі. Шчупака і карася разабралі адразу, ды і дробнага карпа куплялі вельмі добра. На тое ён і рынак — заўсёды ёсць магчымасць выбару тавару.
Пенсіянер Іван Мікалаевіч прыехаў спецыяльна на кірмаш з вёскі Сапяжынка на веласіпедзе. Для сваёй жыўнасці купіў ячмень, а сам вырашыў пакаштаваць рачной рыбы.
Шырокі асартымент мясной i каўбаснай прадукцыі прадставіла на кірмашы ААТ «Задняпроўскі межрайаграсэрвіс». Ужо нязменнымі гандлярамі ў нас сталі прыезджыя гаспадары прыватных падворкаў з Брэсцкай вобласці. Знайшоў сваіх пакупнікоў і мегасад з Горак, які прадставіў на кірмашы саджанцы многіх парод дрэў і кустоў. Асаблівай папулярнасцю карысталіся яблыні, грушы, абрыкосы, персікі, а таксама туі.
На імправізаванай сцэне вітаючы гаспадароў песнямі пра наш родны край, выступалі салісты народнага фальклорнага ансамбля “Багатуха” і ансамбля народнай песні “Дняпроўскія зоры”. Як падзялілася сваімі ўражаннямі кіраўнік “Багатухі” Алена Лінкевіч, артыстам прыемна дарыць радасць людзям, выконваючы беларускія і рускія народныя і аўтарскія песні.
Усваю чаргу, артыстаў быхаўчане не абдзялялі ўвагай, раз-пораз збіраючыся каля сцэны і ад ўсёй душы апладзіруючы. Так, паслухаць і падтрымаць любімую “Багатуху” кожныя выхадныя прыходзіць на кірмаш пенсіянерка Людміла Ждановіч. Яна сама ўдзельніца ансамбля народнай песні “Гаспадыня” і імкнецца не прапускаць канцэрты мастацкай самадзейнасці.
З мэтай папулярызацыі грамадскіх аб’яднанняў і арганізацый сярод насельніцтва на восеньскім кірмашы былі арганізаваны яркія выставы “Белай Русі”, Федэрацыі прафсаюзаў Беларусі, БРСМ, Беларускага фонду міру, дзе ўсе жадаючыя маглі азнаёміцца з іх дзейнасцю і нагляднай друкаванай прадукцыяй.
Ліка КАРАЛЁВА.