АЎТАПАЖАР

3 ліпеня каля двух гадзін ночы ў Быхаўскі РАНС паступіла паведамленне аб узгаранні легкавога аўтамабіля ў вёсцы Глухі. Па прыбыцці да месца надзвычайнага здарэння пажарнага разліку адбывалася гарэнне маторнага адсека машыны, якая знаходзілася ў двары прыватнага жылога дома. Агонь пашкодзіў рухавік, капот, два пярэдніх колы. Пацярпелых няма, прычына пажару высвятляецца.

«МАГІЛЁЎСКАЕ НЕБА»

Пад такой назвай у абласным цэнтры адбыўся III адкрыты гарадскі фестываль авіямадэляў, у якім прынялі ўдзел прадстаўнікі авіямадэльнага гуртка нядзельнай школы храма Святой Жываначальнай Тройцы г. Быхава на чале з пратаіерэем Мікалаем. Юныя авіямадэлісты дэманстравалі «паветраны бой», палёты квадракоптэраў, запуск ракет і кідальных планёраў.

СПЯВАЛІ НА МІНСКАЙ ЗЯМЛІ

Больш за 600 удзельнікаў сабраў рэспубліканскі фестываль харавога мастацтва “Пеўчае поле” у Мядзеле. Прадстаўляць Магілёўскую вобласць на маштабным мерапрыемстве выпаў гонар тром калектывам, у ліку якіх быў і народны вакальна-харавы ансамбль “Ліра” Быхаўскай дзіцячай школы мастацтваў. Педагогі, якія ўваходзяць у яго склад, прадставілі слухачам акадэмічную манеру харавога выканання. У рамках фестывалю галасістыя быхаўчанкі таксама выступілі з канцэртнай праграмай у касцёле Святога Апостала Андрэя ў пасёлку Нарач.

ПА РОДНЫХ МАРШРУТАХ

Экспедыцыйная група навучэнцаў “Магілёўскага дзяржаўнага абласнога ліцэя №5” прыняла ўдзел у рэспубліканскім конкурсе экскурсійных маршрутаў “Пазнаем Беларусь разам”. Навучэнцы ліцэя прадставілі распрацаваны турысцка-экскурсійны маршрут «Памяць аб дывізіі». Па выніках конкурсу яны занялі 3 месца ў намінацыі «Маршрутамі пазнання» і былі ўзнагароджаны Дыпломам Міністэрства адукацыі Рэспублікі Беларусь.

ФОЦ ЗАПРАШАЕ!

Фізкультурна-аздараўленчы цэнтр аб’яўляе пра пачатак спаборніцтваў. Да 7 ліпеня каманды, якія ўключаюць у свой склад двух чалавек, могуць падаць заяўку на ўдзел у чэмпіянаце раёна па пляжным валейболе, які стартуе 10 чысла. Для жадаючых паганяць мяч на поле па міні-футболе, запланаваны гульні з 15 ліпеня. Для ўдзелу ў іх неабходна падаць заяўку не пазней за 13 ліпеня па тэлефоне 55-360.