СУПРАЦЬ “ЗЯЛЁНАГА ЗМІЯ”

Тэрыторыя каля фантана ў цэнтры Быхава стала месцам правядзення акцыі «Мы супраць алкаголю». Фельчар-валеолаг Быхаўскай ЦРБ Ала Печанюк і сацыёлаг райЦГЭ Наталля Палынская раздавалі прахожым памяткі «Будучыня пачынаецца сёння» па прафілактыцы алкагольнай залежнасці ў дзяцей і моладзі, нагадвалі дарослым аб тым, як зберагчы падлеткаў ад ужывання алкагольных напояў. Таксама ўсе жадаючыя атрымалі рэкамендацыі па здаровым ладзе жыцця.

ЧАКАЕЦЦА ПАПАЎНЕННЕ

У Быхаўскай раённай бальніцы праходзяць пераддыпломную практыку 16 студэнтаў з трох медыцынскіх каледжаў: Магілёўскага, Аршанскага і Бабруйскага. Будучыя фельчары і медыцынскія сёстры прысутнічаюць на прыёмах пацыентаў, знаёмяцца з вядзеннем дакументацыі, з працай на медыцынскім пасту і ў працэдурным кабінеце, асвойваюць тэхніку ін’екцый. Зусім хутка будучыя маладыя спецыялісты папоўняць арсенал медыцынскіх работнікаў на Быхаўшчыне. Чакаецца, што ў бягучым годзе ў раён прыйдуць працаваць 27 чалавек сярэдняга медыцынскага персаналу.

ДЭКАДА ДАІ

З 12 па 22 чэрвеня на тэрыторыі раёна будзе праводзіцца дэкада па папярэджанні дарожна-транспартных здарэнняў з удзелам нецвярозых кіроўцаў, а таксама асоб, якія не маюць права кіравання транспартнымі сродкамі. З пачатку года ў раёне затрыманы 34 кіроўцы ў стане алкагольнага ап’янення. Адміністратыўная адказнасць за кіраванне транспартным сродкам у стане ап’янення прадугледжвае штраф у памеры ад 50 да 100 базавых велічынь з пазбаўленнем права кіравання тэрмінам на 3 гады.

СТУПІЛІ Ў ЛЕТА

Займальна прайшло адкрыццё дзіцячай гульнявой пляцоўкі «Вясёлае лета», якая заработала пры цэнтры культуры, народнай творчасці і рамёстваў мікрараёна Быхаў-1. Дзяцей чакалі інтэлектуальныя конкурсы, музычныя гульні, эстафеты. Завяршылася свята міні-дыскатэкай на свежым паветры.