Навіны Быхаўшчыны

новостиЛісты з віншаваннямі

Да Дня Перамогі ў нашым раёне ўдзельнікі Вялікай Айчыннай вайны, былыя малалетнія вязні канцлагераў атрымаюць паштоўкі з віншаваннямі. Іх апдправяць валанцёры праекта «Аніматар для пажылых». Школьнікі самі зрабілі паштоўкі. Дадзены праект рэалізуецца ў раённым цэнтры сацыяльнага абслугоўвання насельніцтва пры падтрымцы германскага фонду «Памяць, адказнасць і будучыня» гуманітарнай праграмы «Месца сустрэчы: дыялог» у супрацоўніцтве з МГА «Узаемаразуменне».

Дарыць дабро

8 мая стартуе штогадовы месячнік Чырвонага Крыжа. «Разам у імя гуманізму» — так гучыць яго дэвіз у гэтым годзе. Усіх неабыякавых людзей чакаюць у раённай арганізацыі Беларускага таварыства Чырвонага Крыжа па вуліцы Сацыялістычная, 34. Сабраныя школьныя пісьмовыя прыналежнасці, адзенне, абутак, цацкі і іншыя рэчы будуць перададзены дзецям са шматдзетных і малазабяспечаных сем’яў, а таксама людзям з абмежаванымі магчымасцямі.

Бяспека дзяцей

Напярэдадні Міжнароднага Дня сям’і і Дня абароны дзяцей на тэрыторыі раёна пройдзе рэспубліканская прафілактычная акцыя «Не пакідайце дзяцей адных!». У перыяд з 12 мая па 3 чэрвеня супрацоўнікі РАНС правядуць шэраг мерапрыемстваў, накіраваных на зніжэнне колькасці надзвычайных сітуацый з удзелам дзяцей і забеспячэнне іх агульнай бяспекі, а таксама для прыцягнення ўвагі грамадскасці да праблемы дзіцячага свавольства з агнём і гібелі дзяцей на пажарах.

Тры дыплома    

Удала прадставілі Быхаўшчыну на V міжнародным конкурсе мастацкага майстэрства ім. А. Грэчынінава навучэнцы дзіцячай школы мастацтваў. Дыпломамі лаўрэатаў III ступені ўзнагароджаны Міхаіл Ясянецкі (намінацыя «Дэкаратыўна-прыкладное мастацтва») і Дар’я Клінцова (намінацыя «Графіка»). Спецыяльнага дыплома ў намінацыі «Жывапіс» за арыгінальнае рашэнне ў рабоце ўдастоена Паліна Краўцова. Трох юных мастакоў падрыхтавала да прэстыжнага конкурсу выкладчык ДШМ Юлія Бялова.