Гэтую сядзібу ў вёсцы Кучын Чарнаборскага сельсавета не заўважыць нельга, бо яна выдзяляецца сваёй адметнасцю, арыгінальнасцю і прыгажосцю. А бачаць яе шматлікія людзі, і не толькі жыхары нашага раёна, бо знаходзіцца тая зусім побач з  аўтамабільнай дарогай Р-120 рэспубліканскага значэння Быхаў-Бялынічы.

Размова ідзе пра падворак шматдзетнай сям’і Галіны і Сяргея Кандрацьевых, якія пастараліся зрабіць са звычайнай сялянскай хаты ды двара ўтульнае ды ўладкаванае месца для пражывання і вядзення хатняй гаспадаркі.

—Мы жылі раней у Кучыне на іншым падворку, але потым вырашылі ўзнавіць хату маіх бацькоў і зрабіць яе сваім радавым гняздом, — распавядае Галіна Пятроўна. — Спачатку ўзяліся за ўнутраны рамонт старой пабудовы, пасля пабудавалі альбо капітальна адрамантавалі гаспадарчыя аб’екты, зрабілі добраўпарадкаванне ўнутранай тэрыторыі сядзібы. Тым часам абзавяліся таксама жывёлаю, каб палепшыць матэрыяльнае становішча сям’і.

Калі трохі абжыліся, пачалі думаць пра ўладкаванне прысядзібнай тэрыторыі, наданне прывабнага віду самаму дому. Шмат чаго прыдумалі і зрабілі самі з мужам, часткова што з ландшафтнага дызайну купілі. Аздабленнем розных клумб, кветнікаў, пасадкай зялёных насаджэнняў займалася я, дэкаратыўныя агароджы, упрыгожванні з камянёў, фігуркі жывёл рабіў муж.

Займаемся добраўпарадкаваннем прысядзібнай тэрыторыі, лічу, мы яшчэ на аматарскім узроўні, аднак тут у нас маюцца болей грунтоўныя планы.

Па настроі гаспадыні адчувалася, што разам з мужам і дзецьмі яны іх абавязкова рэалізуюць, як кажуць, дзеля душы і сэрца.

Мікалай Ахрыменя.