Людміла Багдановіч: усё сваімі рукамі не зробіш, даводзіцца закупляць матэрыялы, абсталяванне, розныя скульптуры
Што да мяне, дык вядомая прымаўка “Не месца ўпрыгожвае чалавека, а чалавек месца” не павінна мець зусім катэгарычны сэнс. Зразумела, што калі асоба валодае выдатнымі прафесійнымі здольнасцямі, годнымі чалавечымі якасцямі, то яна стварае вакол сябе, ці гэта на працы альбо ў сям’і, ці дзе яшчэ, прыемную ды ўтульную атмасферу, акружаючым людзям камфортна мець з ёю стасункі.
Але, калі чалавек старанна ды з густам уладковае сваё працоўнае месца, тэрыторыю свайго жыхарства, то гэта таксама ўпрыгожвае яго як работніка ды асобу. А калі ўсё гэта адбываецца сумесна, то тады можна ўжо казаць пра гармонію.
Менавіта ў такім ракурсе і раскажу пра сямейнае гняздо Людмілы і Мікалая Багдановічаў з аграгарадка Баркалабава. Гэтыя людзі дэманструюць сапраўдную чалавечую годнасць, бо, акрамя таго, што нарадзілі і выхавалі траіх дзяцей, цяпер выхоўваюць яшчэ чатырох прыёмных рабят. Людміла Мікалаеўна і Мікалай Мікалаевіч робяць усё, каб сям’я жыла ў прыгожым, камфортным ды эстэтычным асяроддзі. Гэта тычыцца як маральнай атмасферы, абсталявання ў доме, так і тэрыторыі ўсёй сядзібы.
Расказвае Людміла Багдановіч:
— Калісьці мы набылі звычайную вясковую хату ў Баркалабаве і пачалі патроху будавацца ды ўладкоўвацца. Спачатку гэта тычылася прыбудоў да хаты, гаспадарчых пабудоў, а потым справы дайшлі і да прыхарошвання сямейнага прытулку. Адразу адзначу, што практычна ўсе будаўнічыя работы, асноўнае добраўпарадкаванне рабіў і робіць мой гаспадар уласнымі рукамі. Мне таксама працы хапае, дапамагаюць нам і дзеці.
Можа, па-першасці рабілася ўладкоўванне крыху хаатычна, але потым мы пачалі прадумаваць пэўныя будаўнічыя ды ландшафтныя рашэнні. Самі бачыце, што цяпер па ўсёй тэрыторыі выкладзены пліткамі дарожкі, створаны асобныя зоны для адпачынку, размяшчэння малых архітэктурных формаў.
Усё сваімі рукамі не зробіш, даводзіцца закупляць матэрыялы, абсталяванне, розныя скульптуры, на што, як гэта ні складана, грошы знаходзім. Да прыкладу, на набыццё скульптурных фігураў жывёл нядаўна затрацілі амаль пяць мільёнаў рублёў. У гэтым дапамагаюць нашы старэйшыя дзеці.
Але ўсё ж галоўным у справе добраўпарадкавання сваёй сядзібы для любога чалавека з’яўляецца жаданне, прыбаўленае фантазіяй. Ніхто нас не прымушае гэта рабіць, акрамя пачуццяў годнасці і сумлення.
Планы ў сям’і Багдановічаў па далейшаму ўладкоўванню сваёй сядзібы маюцца вялікія. На чарзе — будаўніцтва капітальнай лазні з эстэтычным знешнім выглядам і адмысловай начынкай, зоны для баўлення вольнага часу дзецям, далейшае ўпарадкаванне тэрыторыі.
Людміла і Мікалай Багдановічы — добры прыклад многім іншым вяскоўцам, а таксама і гараджанам, у арганізацыі сямейнага жыцця, уладкаванні свайго радавога гнязда. Тут ім трэба толькі пажадаць далейшага шчасця і плёну.
Мікалай Ахрыменя.